ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានលើកឡើងថាការបោះឆ្នោតនៅឆ្នាំ២០២៣ នេះក្រៅពីការប្រកួតប្រជែងរវាងគណបក្សនយោបាយចំនួន១៨ ដែលចូលរួមការបោះឆ្នោតគឺនៅមានការប្រកួតប្រជែងជាមួយពួកជ្រុលនិយមដែលចង់បំផ្លាញចោលការបោះឆ្នោត។

សម្ដេចតេជោ ហ៊ុន សែន បានបង្ហោះសារនៅលើ Twitter ផ្លូវការរបស់សម្ដេចនៅថ្ងៃទី១៩ ខែកក្កដា នេះថា ការបោះឆ្នោតសកលឆ្នាំ២០២៣ មិនត្រឹមតែប្រកួតប្រជែងយកកៅអីក្នុងសភាជាតិ រវាង១៨ គណបក្សដែលចូលរួមការបោះឆ្នោតនោះទេ វាក៏ជាការឆ្លើយតបជាមួយពួកជ្រុលនិយមដែលចង់បំផ្លាញចោលការបោះឆ្នោតផងដែរ។

សម្ដេចតេជោ ហ៊ុន សែន បានបន្តថា៖ «ពួកជ្រុលនិយមដែលបញ្ជាដោយទណ្ឌិតរត់ចោលគុកពីក្រៅប្រទេសបានរកគ្រប់វិធីដើម្បីបំផ្លាញចោលដំណើរការប្រជាធិបតេយ្យ តាមរយៈការខិតខំបំផ្លាញចោលការបោះឆ្នោតដូចជាយុទ្ធនាការមិនឲ្យប្រជាជនទៅបោះឆ្នោត និងបំផ្លាញចោលសន្លឹកឆ្នោត។ល។»។

សម្ដេចតេជោ ហ៊ុន សែន បន្តទៀតថា៖ «តើថ្ងៃទី២៣ ខែកក្កដា ឆ្នាំ២០២៣ ខាងមុខកម្លាំងប្រជាធិបតេយ្យដែលចូលរួមការបោះឆ្នោតមានច្រើនជាង ឬមានតិចជាងកម្លាំងបំផ្លាញប្រជាធិបតេយ្យបំផ្លាញការបោះឆ្នោត? សូមរង់ចាំមើលទាំងអស់គ្នា»៕